【now.com財經】話說噚日個人開始wing wing地，喉嚨乾過荷包下唯有食藥瞓覺；今朝瞓醒好似好啲，但喉嚨仍然乾痛。最慘係我家肥貓，兩個人都病咗無人陪佢。
趁未開市先睇咗今日個街貨圖先，牛證嗰邊第一層16,400至16,499點仍然重貨，有相當於1674張期指街貨，但對落嘅少到呢...情況就好似九叔頂住個門口，然後大嗌「走呀！」一樣。咁走咗去邊？純數字上估有可能去咗熊證嗰邊，事關喺熊證街貨上都見到幾乎每一層都有新增期指張數，而驟眼睇上去走嘅同入嘅都差唔多，由幾十至百零二百不等；Even熊證重貨區17,500至17,599點都只係多咗120張期指街貨，但係呢度都儲到有1,159張期指街貨。
有咁嘅移動亦都有得解釋。喺日線圖上見由1月中下旬至今築起嘅「上升通道」仍然健在，令到市場愈來愈多「美夢和幻想」恒指可以擺脫上年至今嘅超大型「下降通道」。而事實係早兩日指數芔噴逾500點嗰日係上破咗，但再去到噚日恒指好似被啲嘢Kick住咁，就係遇到條150線，喺線前仲生咗粒「射擊之星」嚟完場。見到呢粒嘢比淡倉過夜博指數向下回都真係合情合理，就正如3月初恒指日升日跌嘅時侯，但仍然堅守喺「上升通道」底線上，當時都有唔少街貨入定牛證，博技術上指數可以借線再上。都係嗰句：以一浪高於一浪嘅形態向上，總比一下子飆高嘅升法嚟得健康。
技術分析係咁啫，但事實恒指擺位係近上方熊證嘛；而指數今朝早完U後再升多38點，報17,120點；及至開市後指數升幅有見擴大，至依家9點38分，恒指升86點，報17,168點，反映指數繼續向住近街貨嗰邊出發。截至9點44分呢一刻，日線圖150線企好，小時圖亦重奪10線水平，而五分鐘圖亦保持噚日觸完底擺返上中軸完場後，依家向超買方向行埋嗰半咁。
望望近排港股成交，都開始見返千千(億)聲，怪不得港交所(00388)噚日除淨都做得咁強，今日雖然見佢好似回緊氣咁，假設係往後嘅時侯無黑天鵝出現的話，佢都應該可以喺佢個日線圖上面嘅「上升通道」慢慢Un返上去。
終於等到10點，見指數確認企得返上小時圖10線之上，雖然喺五分鐘圖上暫時見到有行「三角形」走勢，但如果指數喺小時圖上守得到10線的話，恒指牛(52070)，收回價16,587點，槓桿約28.09倍；小心指數拉到上嚟呢個位都真係隨時會出現調整，好倉出嘅話借量度線借到去日線圖150線好啦，再借就要比返淡倉架啦，如恒指熊(61149)，收回價17,600點，企高於熊證重貨區唔緊要嘅，因為佢嘅槓桿都有約31.73倍，失守小時圖10線就比啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
