【Now財經台】普拉達(Prada)(01913)公布業績後股價飆升，今日(8日)中午前最多升19%，集團全年多賺44%至6.7億歐元，收益淨額則增長逾12%，點解Prada盈利增長得咁好？
紅蟻資本投資總監李澤銘認為，集團純利升幅高過收入升幅，主要係內部成本控制及營運效率顯著提升，雖然疫情至今奢侈品行業收入增長大幅跑贏其他行業，但後期整體增速放慢，然而，喺呢個情況下，Prada今年首9個星期嘅收入增長，仍跟去年第4季差唔多，反映今年仍可以維持雙位數增長，為市場帶嚟驚喜。
摩根士丹利指，市場預測過分保守，將Prada目標價上調至65元，係咪代表Prada仍有水位？Alan解釋，Prada未有提及今年銷售目標，全年收入、盈利及毛利率都冇任何指引，如果睇返現有嘅訊息，市場都應該會上調收入及盈利預測。不過，Prada股價今日有升過龍之嫌，即使大摩上調目標價，其實都差唔多到價，相信股價短期唔會再大升。
