【Now財經台】新世界發展(00017)今日(1日)旗下荃灣愉景新城商場D‧PARK，獲華懋以逾40億元買入，新世界獲利約13億元，不過，新世界股價午後跌幅擴大，收市挫逾6%。新世界指，樓市全面「撤辣」後，會趁樓市氣氛向好搶先推盤，提早於未來6個月推出約2500伙應市。不過，睇返新世界股價，係咪都要等美國聯儲局下半年減息先可以翻身？
紅蟻資本投資總監李澤銘指，美國減息當然有幫助，但如果只減1至2次，而幅度只介乎0.25至0.5厘，作用可能唔大，加上美國加咗咁多次息，本港最優惠利率(P)只係跟加兩次，所以即使美國減息，香港係咪跟足都係好大疑問。
Alan又話，由於銀行都開始水緊，睇返美國之前兩次減息後嘅情況，未必幫到新世界好多，估計今年要繼續面對高息壓力，集團會持續出售資產套現減債。
