【Now財經台】截至早上11時止，過去1小時內《彭博》用戶搜尋量最多港股，依次為新世界發展(00017)，中國石油股份(00857)、東風集團股份(00489)、中國海洋石油(00883)、建設銀行(00939)。
新世界股價今日(18日)已連跌第6個交易日，累跌近20%，今年就累跌逾50%，依家集團市值135億元，市帳率(PB)0.08倍，除咗股價，債價亦受壓，昨日(17日)市傳新世界要求銀行豁免財務指標條件限制等，雖然集團不斷出售資產減債，但債務問題係咪仍然令人憂慮？
資深證券分析師彭偉新指，市場將焦點放喺新世界嘅債務問題，雖然集團努力減債，將部分資產賣返畀母公司，減以輕負債，但喺本港經濟比較困難下，市場對新世界收返資金嘅預期唔高，令股債持續受壓。佢又指，短期較難評論新世界會有咩動作，但相信投資者都希望公司繼續減債，盡量攞返啲錢返嚟維持營運。
至於市場擔心新世界可能有破產或除牌風險，Castor認為，雖然集團負債較高，但仍然係一家淨資產公司，情況未去咁惡劣，估計應該唔會被除牌。
