【Now財經台】中興通訊(00763)股價今日(27日)早段冇乜動靜，但中午前突然由跌轉升，大幅抽高，午後升幅擴大。集團係世界移動通信大會(MWC)参展商之一，喺會上發布公司第1款摺Mon手機，呢個係咪股價突然炒起嘅原因？
信達國際研究部主管趙晞文指，中興喺電訊領域係一家全產業公司，手機只佔消費電子小部分收入及盈利，單靠推出首款自家摺Mon手機，唔足以推高股價逾10%，反而5G技術產品及解決方案佔集團整體收入近70%，係中興業績增長動力嘅主要來源。
股價方面，中興股價今日衝破100天線，至於應唔應該高追，佢指出，如果呢幾日都企得穩17元樓上，有條件食住MWC熱潮，或借發布新產品再衝多浸，但唔好期望過高，喺20元阻力博升多10%已經好好。
