【Now財經台】中興通訊(00763)股價今早(11日)低開逾1%後，好淡爭持，臨近上午11時，中興A股漲停板，資金轉掃H股，股價一度抽高逾11%，高見23.45元，成交股數較過去100日同時段平均增4倍。
在上周舉行嘅進博會，中興以「5GA、低空經濟新引擎」為主題參展，集中展示5GA技術喺低空經濟嘅應用。近日市場關注機器人概念板塊，Sell低空經濟發展嘅中興，A股今日已連升第6個交易日，今日喺大成交下漲停板，H股終於有反應，仲要價量齊升，終於打破今個月嘅橫行格局，股價一度逼近24元，但仍未挑戰到10月初高位，即28元水平。
近期資金似乎專吼落後股，後市要留意中興A股可唔可以繼續衝高位，繼續帶挈H股，中興上季業績令市場失望，收入及淨利潤齊跌，喺宏觀經濟未有改善下， 電訊商好難增加資本開支，估計中興業績短期內都較難有改善。
