【Now財經台】聯想集團(00992)中午公布第3財季業績，雖然上季少賺22%至3.37億美元，但收入增長近3%至逾157億美元，聯想股價午後拗腰升3%，收報8.84元。
早前，集團預告將於下周一至周四(26至29日)舉行嘅年度世界移動通訊大會(MWC)上，推出最新人工智能個人電腦(AI PC)及其他顛覆市場嘅產品。
其實聯想早於去年12月已正式推出首批產品，不過，耀才證券研究部總監植耀輝認為，新產品滲透率唔會太高，對盈利冇幫助，始終依家仍未有足夠應用場景，相信集團選擇依家推出新產品，更多係出於「搶頭啖湯」嘅心態，鞏固集團喺全球PC市場嘅龍頭地位。
不過，對於1月底有美國前軍人提議禁用聯想PC，Stanley認為，集團嘅PC產品被美國制裁嘅機會唔大，反而更擔心旗下手機品牌Motorola，因主要市場喺北美地區及拉丁美洲，或成為美國針對嘅目標。
