【Now財經台】截至早上11時止，1小時內《彭博》用戶搜尋量最多港股，依次為建設銀行(00939)、同程旅行(00780)、美團(03690)、華潤置地(01109)及聯想集團(00992)。
內銀今日(13日)整體表現強勢，除咗建行，好多隻內銀股都趁勢向上突破，派中期成績表前，市場係咪炒內銀股會派中期息？喺依家嘅市況下，7厘息係咪好吸引？
富途證券首席分析師譚智樂指，如果呢類高息股嘅派息能力畀到市場信心，今年有望跑贏大市。雖然經濟低迷，但主要同消費降級或經濟疲弱有關，今年亦未見有大型內房出現壞帳、違約等問題，所以市場對內銀派息能力有信心，短期關鍵在於會唔會派中期息。
Arnold續指，國企改革鼓勵企業提升透明度，派息由每年派1次，改為1年派兩次，但喺股息率不變下，企業都願意跟政策行。佢估計，內銀股業績前仍會強勢，但短線而言，唔建議喺貼近52周高位追入，中長線而言，投資者可以喺現價買入建行，有近8厘股息率之餘，股價有機會上試6元水平。
