【Now財經台】截至早上11時止，1小時內《彭博》用戶關注度上升最多首5隻港股，依次為萬科企業(02202)、中國電信(00728)、中國銀行(03988)、希慎興業(00014)、新鴻基地產(00016)。
內銀股昨日(21日)借人民銀行大減貸款市場報價利率(LPR)嘅消息炒起。今日又有消息，國家金融監管總局公布，去年第4季商業銀行淨息差1.69厘，再創歷史新低，按季收窄4基點，再加埋LPR減25個基點，排名第3嘅中銀昨日升逾1%後，今朝股價偏軟，中午收報3.13元。
椽盛資本投資總監曾永堅認為，內銀板塊呢輪反彈主要是LPR減幅大過預期，以及追捧「中特估」概念股嘅資金來追落後，相信投資者好快會關注返基本面。
Jaseper續指，內銀身負國家重任，被要求收窄息差來救樓市並谷實體經濟，幫唔到銀行嘅利息收益之餘，內銀信貸及資產質素亦可能因此惡化。佢又指，近月不斷增長嘅廣義貨幣(M2)供應中，唔少係幽靈資金，只係喺銀行之間流通。
