【Now財經台】比亞迪股份(01211)打響龍年減價戰第1槍，秦PLUS榮耀版售價最平不足8萬人仔，集團目標係推出比燃油動力汽車更平嘅電動車，又會同時推出高端車款，不論高端及平價市場都要搶，但毛利率仍有18%，係咪反映比亞迪有本錢打減價戰？
紅蟻資本投資總監李澤銘指，依家嘅汽車不論配置、外型都好相似，所以只能比併價格，仍然有錢賺嘅少數車企如比亞迪，的確有本錢打價格戰，加上比亞迪幾乎擁有整個產業鏈，隨著上游嘅碳酸價格持續下跌，比亞迪嘅車價自然可以隨著成本下降而向下。
Alan又指，今次減價對內地車廠打擊更大，短期而言，傳統車企車價幾萬至十幾萬嘅車款影響較大，但長遠嚟講，最受影響係賣高價新能源車嘅車企。佢續稱，其實去年開始，整體車企已面對減價戰，最終要睇各車企嘅現金流及財力撐唔支撐到落去。
