【Now財經台】美國最新向120個國家實施人工智能(AI)晶片出口配額，其中，中國及俄羅斯等22個國家或地區，更被完全禁止獲得美國先進晶片。中芯國際(00981)繼續炒「國產自強」，股價今朝(14日)一度破頂，曾升逾4%，高見35.8元，之後曾短暫倒跌。近期好倉繼續食糊，連續4個交易日有資金流出，但今朝突破阻力後，一度倒跌。如果繼續睇好「國產自強」主題，熱門CALL及牛證槓桿都差唔多，應該點揀好？
星展香港環球金融市場上市產品主管周國威指，中芯股價喺2024年12月中，見過25元低位後，一直逆市向上，踏入2025年，股價更突破30元，並跑贏大市。
佢又話，中芯適合用CALL輪做部署，較受歡迎嘅CALL行使價約40元，今年7月到期，實際槓桿3倍，適合中線博中芯向上嘅投資者。
周國威續稱，如果認為中芯股價突破阻力後，有機會加快向上，可以考慮較價外嘅CALL，行使價50元至60元，今年3月底至4月初到期，槓桿5倍至6倍。
