【Now財經台】港股及A股1月表現仍未有起色，其中，港股3大指數累跌逾9%至20%，其實中央上月已不斷出手，使出「組合拳」刺激經濟及救股市，但A股及港股仍要墊底，似乎中美角力、中國恒大(03333)清盤、內房銷售繼續跌、內地陷入通縮，抵銷晒中央嘅托市作用，若要扭轉劣勢，短線仲可以靠乜嘢？
鴻鵠資產管理行政總裁陸庭龍指，投資者嘅悲觀情緒主要來自對內地經濟失去信心，因為經濟狀況去年至今一直冇好轉，市場期望中央推政策救市，包括用平準基金呢招，但值得留意係，過去每次話用平準基金救市都「只聞樓梯響」，即使有消息傳出，但未見有實際行動，因此，令市場對內地經濟大失信心，如果嚟緊嘅2萬億人仔平準基金情況都係咁，港股及A股都好難扭轉依家嘅局面。
