【Now財經台】舜宇光學(02382)發盈警，預期最多少賺55%，股價今朝(31日)低開後，愈跌愈多，並跌至7年低位，唔少槓桿3倍至5倍嘅CALL輪，輪價大跌20%至30%。
瑞銀亞洲股票衍生產品銷售部李梓維表示，舜宇股價已跌穿2023年10月低位，即50.3元，唔少好友有意博反彈，但流入嘅資金唔算太多，條款主要揀價外幅較大嘅CALL，行使價90元，年底到期，槓桿4倍，適合做短線博反彈部署。
Alvin又話，PUT輪選擇就唔係咁多，因為大部分PUT都係價外，槓桿僅1.6倍或1.8倍，唔係太多投資者喺呢個位追沽。至於之前買入嘅熊證，有50%收回距離，所以唔使擔心收回風險，槓桿1.6倍至1.7倍，同PUT輪差唔多，所以唔想承受時間值損耗，又唔擔心收回，可以留意遠價熊。
