【Now財經台】據《彭博》報道，平安銀行已將41家發展商列入有資格獲得融資支持嘅名單，除內地房企外，更包括新世界發展(00017)及新鴻基地產(00016)等香港發展商。不過，消息對內房股冇支持之餘，其中，上榜嘅龍湖集團(00960)更一度挫逾7%，點解會出現呢個情況？
英皇資本財富管理方案研究總監陳錦興分析指，近排整體市場氣氛唔算好，內房板塊更持續積弱，雖然中央已連番出手，包括放寬限購令，又批准房業發債、向銀行借貸，但情況仍未見明顯改善，今次平安銀行出手固然對資金面有幫助，但相比中央之前嘅政策，對市場嚟講唔算係一個特別利好消息，所以亦冇乜反應。
Stanley又指，其實市場更關注內房銷售，因為樓盤賣唔出，庫存積壓只會繼續拖累經濟，睇返上個月唔少大型內房嘅合約銷售按年都要跌，就解釋到點解早前融創中國(01918)即使達成境外債務重組協議，股價仍原地踏步，甚至要再下試低位。
Stanley總結中央政策需要時間發揮作用。但投資者明顯等唔切。市場對內房股氣氛偏弱，依舊存在沽壓。
