【Now財經台】截至早上11點，過去1小時內《彭博》搜尋量最多港股，依次為長和(00001)、中國移動(00941)、中國電信(00728)、港交所(00388)及新鴻基地產(00016)。
長和7月中分拆歐洲業務上市消息炒到依家，股價繼續喺10天線徘徊，表現強勢，雖然近日跟大市略為調整，但幅度唔多，而4月以嚟嘅升勢仍未被破壞，近日稍稍回調後，息率仍有6厘，當「中特估」概念股都要調整，長和股價表現係咪已經好靚及都收資？
大華繼顯執行董事梁偉源指，長和業務遍布全球，喺本港一手樓市場亦唔係重貨，加上環球股市資金撤出之前升得比較急嘅科技股，從整體市場去睇，長和係有一定吸引力，雖然業務方面冇好大突破，但勝在穩定，始終投資者依家嘅避險心態比較重，所以部分資金會買入呢類業務唔算刺激嘅股份。
Steven又話，集團一啲分拆計劃亦可以為市場帶來一啲憧憬，喺市況不明朗下，長和係會有一定吸引力。
