【Now財經台】閱文集團(00772)今日(12日)一度升9.1%，高見30.65元，係表現最強勢科指成分股，閱文宣布電影《熱辣滾燙》將於春節檔期上映，獲摩根士丹利睇好短期股價表現，到底呢套電影會唔會跑出？
紅蟻資本投資總監李澤銘指，內地演員賈玲首次執導嘅《你好，李煥英》，票房喺2021年大旺場，今次再執導《熱辣滾燙》片房係咪一樣大收，就要多啲時間證明有冇持續性。對於投資電影相關嘅股票或公司，市場一般唔會畀太高估值，因為投資電影係高風險，回報又未必有保證，如果扑中某套電影會大賣，短期係會對股價有支持。
至於閱文可以炒幾耐？Alan就話，騰訊雲最新公布「微短劇綜合解決方案」，若短劇可因此進一步推廣及興起，對於活化閱文本身嘅IP或將IP變現，對閱文股價會有較大幫助。佢又話，長遠嚟講，閱文股價及估值有提升空間，估計短期會受制於30至31元水平，短期難以突破阻力位之餘，亦有一定調整壓力。
