【Now財經台】寫字樓租金繼續被睇淡,滙豐證券最新嘅本地房地產報告指,本港整體寫字樓空置率升至12.9%嘅高位,空置率已經超越2003年「沙士」時水平。
艾德金融董事陳政深表示,本港寫字樓租金持續下滑,主要係經濟前景唔明朗,令外資唔再選擇喺香港設立辨公室,或縮減現有規模。雖然疫後有企業繼續採用居家工作模式(WFH),但WFH都唔係本港大部分中資及港資企業首選,因此,WFH唔係持續打擊寫字樓需求嘅主因。
寫字樓租務前景看淡,對太古地產(01972)呢類股份係咪有好大影響?雖然大行將太地評級由「持有」上調至「買入」,但Ryan提醒投資者仍要審慎,因為寫字樓租金佔太地總收入40%,雖然集團現金流管理做得好,但如果要提高派息比率,意味要維持派息金額,但實際用嚟派息嘅錢係少咗,所以入市前都要諗諗。