【now.com財經】噚日揀咗好淡兩隻倉喺手，最終見指數喺小時圖失守100線後拎咗隻淡倉出嚟，可惜落場個唔多靚，還好及時走人之下，先至可以避過下半場2點打後嘅忽然抽高，仲抽到指數一度倒升。作戰室當然開出好倉追上啦。
今朝恒指開市見跌72點，報16,573點。甫開市後指數向下，好似跌咗落無底洞咁直插，只係用咗3分鐘時間就落到16,455點，依家只係9點41分，呢口價暫時為今日低位，皆因之後指數清晒16,500至16,599點即第一層牛證街貨嗰401張期指之後，火速出下影線兼跌幅大為收窄至過返今朝開市口價，可能國家比佢嘅任務已經完成，嚟到依家9點53分，指數跌幅一度縮到得個位數，依家五分鐘圖上見回到上中軸之後暫時未過線，作戰室今日雖然先淡後好，但都唔係容易追。
暫時見指數整體都係向上運行，只不過力度真係唔係好大，成交實在比較奀。而10點打後嘅小時圖見保歷加通道口收到勁窄，恒指今朝低走後抽高推返佢靠近返中軸位，本來過中軸/過線比返好倉出去追上合理，但隨住保歷加通道口收窄之下，都有少少怕佢推唔闊。
終於都見到指數玩到升，作戰室好倉繼續之下，拉埋噚日高位+平頂16,673點作量度線，而依家10點18分指數一度抽高去16,669點，同呢個位只係爭4點；同戰友s傾緊約出嚟食飯，吹吹下水無啦啦一棍向上打上去，指數反方向踩返熊證第一層街貨，拉多少少借小時圖指數企上所有平均線之上而出好倉追上保歷加頂線的話，水位唔係多，動作要快。
繼續跟住前日(1月3日)手痕揀嘅冷門嘢蘋果(AAPL.US)嘅Put(10043)，隔晚見蘋果股價再落多2.3%。日線圖上見股價終於失守150線嘅同時，以收市價181.9美元計，同步亦失埋條100線。陰陽燭形態見接近「十字星」，而呢口價創咗蘋果一個月新低，Slow STC(14.3)兩線亦已落到超賣至嚴重超賣範圍，不過保歷加通道口仍然拓闊中，要博就仲有嘅，只係今日星期五，想知佢仲有無得落一係今晚唔瞓，一係第二日起身先見到。但無論係邊個方案，都只可以喺下個星期一(8日)返嚟先至可以處理到隻(10043)。
如果打算今日處理咗隻(10043)的話，基本上呢類underlying嘅輪喺我哋日頭(人哋夜晚)嘅變化就唔會好大，除非有啲驚天地嘅消息出現啦，你睇返呢類型嘅輪價走勢圖就會明架啦，所以依家見證價報0.048元，都比較大機會全日都係呢個範圍(最多可能上落一格)游走，以呢個價計算，對比前日嘅入場價，咁都平均有格或6.67%落袋，嘿，唔呃你呢一注喺我【月度報告】裡面，暫時係成績最好嘅一注。
作者阿珊，以技術分析專心玩輪證，唔貪心，努力賺取我家肥貓罐罐。
