【now.com財經】上個星期五(11月17日)以平均買入價0.026元買咗隻恒指熊(59540)，本身Set好以五分鐘圖10線做量度線架啦，佢有上過架，但兩步路又被20線擋住，坦白講隻(59540)又未係好有肉食，反正整條保歷加通道打橫行，上移中軸作量度線亦都係平時見保歷加橫行時會用得上嘅量度線，少少轉陣；但如果你唔係睇住個市嘅話，其實嗰10點嘅高度真係唔多覺。
下半場我都有嘢要做，一邊做一邊用手機睇住個市嘅走勢，個腦大約記住條指數行到邊、自己目標價係邊、有無失心瘋飛咗唔知邊度外太空呢三樣就得架啦。去到1點40分左右，眼尾望到本來跌370幾至380點架嘛，忽然向下「大跌」20點見跌夠400點有多喎(係呀，噚日條保歷加底線至中軸得32點左右高，咁你話佢郁20點係咪已經好大比例啦)，呢個時侯先至放低手上嘅工作睇返個走勢圖(話就話Day Trade要睇到個市實啲啫，又未到於目不轉睛嘅)，見指數終於向住日線圖20線出發仲要到步喎，(59540)走得。
如常用10分鐘作為走貨時間的話，按1點40分至1點50分期間。(59540)高低位做過0.029元/0.028元，平均走貨價為0.0285元。平均執2.5格或9.62%，我下次會揀貼啲架啦。
呢兩日天氣都比較清涼，還好晏晝都仲有少少太陽，我家肥貓都仲可以曬住太陽暖少少，就連恒指都好似回暖返，今朝開市升171點，報17,625點。不過嚟到依家9點49分，呢口開市價暫時變成指數今日高位，高開低走之下恒指依家升幅收窄至升125點，報17,579點，不過，今朝指數開市首半個鐘都仍然喺呢個範圍上上落落，作戰室第一注都仲有舉棋不定，未有方向真係落唔到手。
小時圖上則見指數喺首半小時出現「錘頭」物體，下影線剛好踩住50線，而10線仍然壓住指數，彈動不得。
返番去五分鐘圖就明啦，指數今朝上上落落用咗半個鐘時間行出小型「三角形」出嚟，怪不得呢頭想出好倉時指數又回，回到咁上下諗住順勢淡倉比出但指數又即縮啦。一開市就出「三角形」，仲要幅度咁窄，叫人點玩？唔通要玩到借日線圖10/50線出淡倉望多次條20線咩？
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
