【now.com財經】噚日揀咗隻恒指熊(56404)出嚟，即出即追；再用大約一小時嘅時間爬咗3格返嚟；無計，仲有少少餸尾可以食得到都算係咁(餸頭喺邊度食唔駛我再講啦)。
話咁快11月又過咗一半，即係仲有大約六個星期左右就要同2023年講拜拜，走馬燈回顧今年，學我老爸噚晚話齋：有邊個好過？個市又垃圾、又打仗、經濟又唔好...最好快啲過。係嘅，經濟週期同人嘅一生都係一樣有起有跌，靜靜地渡過艱難嘅時期都係一種「體驗」。
就好似今年年尾經歷過幾次恒指闖18,000點關都屢試不果，「18,000點真係咁難破？」er…說穿了市場其實都係由人創造出嚟，所以好理性咁講句：事在人為架啫。早兩日指數乍現上破年初至今嘅大型「下降通道」，噚日未能企穩向下回落，至今日恒指開市再跌248點，開市報17,584點。「又話有18,000點嘅？」我家老爺準備出門口執緊嘢時問；「吓？早兩日嘅事嚟架喎...」
如果有睇開牛熊證街貨圖嚟炒嘅話，今日應該無懸念地開市出淡倉，事關本身指數企喺牛熊中間位，但就係開市跌嗰248點，將指數一下子推入牛證第一層街貨，而首兩層牛證街貨各有過千張期指喺度，走避不及嘅一定有，而17,400至17,499點嘅牛腳震中。
今日先睇個日線圖，依家9點55分，今日天氣開始凍到手指僵硬，打字都打得慢。恒指暫時高位做過17,631點，同50線(約17,635點)差不多，咁啱10線(約17,620點)又喺附近，雙線阻力+重肥牛，今日目標望20線(約17,420點)都未完全殺晒兩層肥牛，我都算有良心。
恒指熊(59540)，收回價18,000點，今日新上所以未見有街貨，同現價有約400點，的確係要小心五分鐘圖條Slow STC(14,3)隨時會因條保歷加通道整體向下而出觸底，勇敢嘅可以考慮直出(作戰室一早出晒啦)，安全少少嘅，等一等指數喺五分鐘圖會唔會有條10/20線擋路先至再出。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
