【Now財經台】今年「雙11」購物節期間處理嘅快遞包裹逾52億件，按年增長逾20%，不過，各大平台暫時仲未公布今年「雙11」具體銷售數字，其中，京東集團(09618)只係話，「雙11」當日成交額、定單量及用戶人數創新高。值得留意係，不論京東或阿里巴巴(09988)旗下淘天集團，已連續兩年冇公布實際銷售數據，係咪代表「雙11」購物節已經冇話題性？
華夏證券行政總裁王榮昆表示，內地人嘅消費習慣已改變咗，消費者過去會因為「雙11」有折扣，將半年嘅消費需求一次過喺「雙11」釋放出嚟，但依家網購平台選擇多咗，除咗淘寶、天貓外，抖音、快手(01024)及拼多多都可以買到唔同嘅心水貨品，加上不時提供唔少折扣優惠吸客，所以唔一定要再等「雙11」。
James又話，由於內地經濟增長放慢，雖然「雙11」成交額及定單創新高，但其實升幅並不顯著，所以各平台覺得冇必要公布具體數字。
