【now.com財經】噚日揀咗隻蘋果Call(10042)出嚟，以日線圖上保歷加通道頂或50線作為目標，由於無Set過落場位，同時一早講咗呢隻係以日線圖睇線做目標，所以以噚日(10042)全日做過嘅高低位0.158元/0.157元計，平均買入價為0.1575元。
睇返噚日蘋果走勢，股價再升多0.85%，報178.99美元，高位見過179.05美元，同目標嘅保歷加頂線(約179.69美元)相差不遠；更準嘅係同條50線(約179.05美元)重疊咗，目標都算是達到。同步亦見盤後蘋果股價下行，跌0.034%，睇嚟一陣開市隻(10042)先走為上。
終於等到恒指完U(噚日下晝兩點即開無U盤有啲唔習慣(≖ᴗ≖๑))，指數升209點，開返上去報17,726點。及至依家9點48分，恒指最高見過17,895點，首兩層熊證街貨全數被吞沒，呢度夾埋有相當於767張期指，至於17,800至17,899點呢層，理論上得返4點生命值，呢層有相當於424張期指，如果都當呢層掰埋的話，全數今朝食咗1,191張期指。
再睇下隻(10042)，今朝開市都見輪價向上，以初初定落嘅目標價達標後走貨的話，按今朝開市後如常的用10分鐘作為走貨價，期內(10042)高低位做過0.178元/0.177元，平均走貨價為0.1775元，呢一趟初嚐蘋果Call過夜平均執廿格或12.7%。
嚟到依家9點59分，指數最高暫時做過17,816點，連之前預估17,800至17,899點嘅熊證都索性直接count佢死埋，如果今日企得到17,800點樓上的話，怕且下一關可以重新挑戰18,000點。作戰室友們不貪心，今朝好倉開出後，爬格仔密密食嘅又有，一注hold耐少少見過17,900點到步食嘅都有，總之正數就好啦。
再睇返個日線圖，今朝指數開市口價已經用咗13點嚟企住喺20天線之上，由9月初至噚日嘅「下降通道」已經破咗，Slow STC(4,3)兩線早已出觸底，早一定兩個星期前畫過嘅「底背馳」似乎已經生效，但唔好心急，呢啲比分鐘圖更「大型」嘅技術指標，係應該要比多少少時間佢確認破位同生效。
換個小時圖上見，指數於150線前有止步，不過反方向向又唔係好覺，暫時見指數有似跌唔落嘅情況。 再換返個五分鐘圖見，指數於17,900點初段見阻力後，依家10點19分有見指數向下稍過10線，同步整條保歷加通道亦有開始呈上嘅走勢，換言之指數同Slow STC(14,3)有隨時出swing嘅走勢。
蓋目前指數咬住高位唔放，似乎有等線借力再上之嫌，恒指牛(55693)，收回價17,331點，市場上第三貼價牛證，同現價有逾540點嘅距離(無計啦，今日一下子扯得咁多)，槓桿有約25.17倍，已經係成個市場上第二高槓桿嘅牛證。
依家10點25分，指數同Slow STC(14,3)開始行Swing，先留意中軸位有無企穩，有嘅當進取mode出動，否則如常的用返Slow STC(14,3)做Swing等超賣位先至再出動。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
