【now.com財經】噚日揀咗恒指熊(54382)同埋恒指牛(52517)出嚟，借恒指五分鐘圖配Slow STC(14,3)出觸頂/底嘅Swing Trade玩法去做Day Trade。
先喺上半場完成咗(52517)嘅Swing，平均執到6.5格或12.26%，玩法喺噚日嘅【輪證下半Part】已詳述，不贅。
至於隻(54382)，喺噚日上半場走隻(52517)之後就反手入埋，平均買入價為0.0315元，由於喺噚日中午收市時見到指數同Slow STC(14,3)都由入貨時嘅超買位向下回落到中軸附近，唯同步見保歷加通道口有所收窄，所以特登未完Lunch都出咗隻【輪證下半Part】先，就係擔心下半場開市後，指數到保歷加底線但Slow STC(14,3)仲未到就被佢屈返上去，有提早收割嘅可能。
到噚日下半場開市，指數就向下直插到落去保歷加通道底線，跟手即出爭一點平底，同步見Slow STC914,3)向上，(54382)都真係可以先行離場。以1點開市如常用10分鐘作為走貨時間的話，期內(54382)高低位做過0.036元/0.033元計，呢一趟平均快閃價為0.0345元，平均快執3格或9.52%。
其實噚日喺下半場再稍後時間都可以做多一次Swing，只不過Slow STC(14,3)係未低於20，但指數就踩住咗保歷加底線上行，呢一下去到尾市仲一度上返去18,000點樓上。
今朝恒指開跌57點，報17,939點，呢口價仍然都係處於近日喺日線圖上可以畫到嘅窄「長方形」178XX至1800X點呢個範圍。拉到盡得百幾點鬆啲，做Day Trade都唔容易，真係搵食艱難。
既然係咁，唯有向個股發展。睇咗幾日嘅中移(00941)，So far見佢噚日上破得到「雙底」頸線，本來應該比隻好倉出去試下，但今日返嚟高位暫見出「吊頸」，作死；而整條保歷加通道有開始趨向上行，Slow STC(14,3)兩線已經上到超買位，唉，等到破位但又開始轉勢樣，咁昂唔係第一次遇到嘅，下方10線等接住指數時再睇。
另外，今日見到隻港交所(00388)跌得都比較多，無睇佢一段時間，佢又開始準備落返去之前大約282元水平嘅「三底」位，而保歷加通道目前保持平衡，構成咗就到觸底嘅Swing Trade環境。
換個五分鐘圖睇港交所，見股價喺9點55分出咗「身懷六甲」，Slow STC(14,3)仲見觸底，不過，第一關要過嘅係條10線。唔過10線嘅，港交熊(53527)，收回價320元，同現價有約9%距離，應該都夠安全，槓桿有約9.05倍，喺差不多收回價嘅熊證堆當中，佢槓桿最高，Day Trade嘅話依家10點11分見佢開始被條10線頂住，所以變相保歷加通道口要再拓闊返多啲先至可以有位比佢繼續向下再落，如果唔係因住佢出Swing彈返上去。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
