【now.com財經】上個星期五(9月15日)本來一早揀定隻恒指好倉諗住借線追升，作戰室一早追出無問題，但喺呢度實在指數上得太快，借唔到線，唯有試下搵啲個股埋手，最後Pick咗隻中移(00941)，事關喺上個星期五已經見佢喺日線圖上踩住咗中軸，仲同Slow STC(14,3)一齊再抽高，保歷加通道見到拓闊，同步亦都見有少少似上破「雙底」頸線。所以如果打算捉佢上破「雙底」頸線嘅，一早執定隻中移牛(54902)出嚟，安全嘅等今日返嚟之後見「雙底」頸線確認上破就出動，否則就要重新量過佢係咪又行「長方形」。
話咁快9月又過咗一半，仲有半個月又到中秋同準備踏入第四季，姑勿論今年成績如何，大家都有著同等嘅時間去進行每一日嘅交易，成績好嘅唔好囂，唔得嘅請好好利用埋最後嘅一季，炒輪證嘅既有得買升亦有得買跌，只係最怕個市唔郁啫，動作上已經可以做到好靈活架啦。
今朝恒指開市向下碌返百零點，報18,069點開市。睇返今日嘅牛熊證街貨圖，目測見牛證街貨仍然比熊證嘅街貨多，明嘅，之前經歷過六連跌之後，喺上個星期五比佢重上返10/20天線，好友傾盡全力諗住反擊淡友，但關鍵在於上個星期五完U後，恒指擺位係低返喺20線以下。依家9點44分，指數開市後最低落到去17,894點，牛證首兩層街貨全數被收回，呢度有相當於800幾張期指。
本以為指數都會向下衝落去繼續殺牛，事關見街貨圖上見啲牛真係好適合用嚟打邊爐，但可能要慳住食，更甚嘅係日線圖上嘅保歷加通道已經收窄到變平衡，近日見指數亦只係喺中軸至底線之間運行，嚴格嚟講指數都未踩過底線，以中軸至近日低位大約178XX點計，其實呢度只係得300零點高度。
作戰室第一轉淡倉已經完成，依家反手緊；五分鐘圖Slow STC(14,3)兩線已經出咗觸底回返上靠近中軸水平，果然呢幾日一穿18,000點之後就好快抽返上去，恒指牛(53006)，收回價17,666點，同現價有約363點距離，槓桿有約33.39倍都夠做Day Trade。
大市咁樣嘅上落市格局，暫時真係只可以炒波幅，呢啲位更加唔好貪心。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
