【now.com財經】噚日揀咗隻恒指牛(68070)出嚟，喺下晝見指數於中軸有支持就選擇進取出場，平均買入價為0.053元，順便set埋以中軸位做量度線。
落場後大家都知都下半場往往比上半場行得慢，但唔緊要，方向啱就得啦，喺落場後計，指數大約用咗差不多一個鐘嘅時間咬住保歷加中軸慢行，去到2點半忽然跳高，將恒指一下子迫上19,300點，同時將19,200至19,299點嘅熊證全數吞埋，嗰度都有600幾張期指街貨架。
由於中軸未失，所以(68070)繼續在手，呢啲忽然破位出現如果你都有貨的話，其實係可以爬完格仔走人。一直持貨至最後10分鐘，見指數高位回落返去靠近中軸水平，如常的喺收市前10分鐘指數都無觸及過量度線的話，望望你自己手上嗰注，如果你認為只係一杯珍奶咁大注嘅話，你可以選擇過夜；反之即時走人今晚發生咩都唔關你事。
而呢度嘅作風向來都係唔過夜(純綷個人比較鍾意有覺好瞓)，以3點50分起計10分鐘作為走貨時間，期內(68070)高低位做過0.064元/0.062元，即平均走貨價為0.063元，一計之下，呢個下午平均都爬到10格/18.87%返嚟，悶聲發財...算唔算發財先？
今朝前所未有咁早彈起，事關塊面出咗一撻濕疹，搽咗一個星期類固醇都未好晒，今朝診所未開已經排定隊，到診所開咗半個鐘唔夠，成個診所已經坐滿晒，姑娘話依家排籌排到第40個，真係好生意過港交所(00388)。還好9點半未到已經睇完醫生，仲祝我手術成功，翁醫生你好Sweet呀！
恒指今早開市微跌17點，開市報19,289點，呢個點數確實是無咩可以做。到恒指開市之後見佢稍稍向下，但落到五分鐘圖保歷加通道底線後又再彈返上去，依家10點11分，指數暫時最高見過19,432點，將熊證第一層街貨全數收回，不過呢度相當於25張期指，少到連前菜都稱唔上，而19,400至19,499點嘅熊則有相當於385張期指，打上嘅都有唔少，開始有肉食嘅。
至於牛證方面，今日見有一層新增街貨層，最貼價見18,900至18,999點，雖然有新貨，但係同現價都有400幾點差距，雖然未至於擘到好闊，不過假如指數再向上殺熊嘅同時，下方牛證出唔切的話，咁牛熊嘅差距又會再次拉闊，同之前情況有啲似，不過係指數一味靠近牛證街貨而熊證又老年咁遠，令指數不停向下。如果今次街貨同指數嘅擺位相反的話，咁指數見升指日可待。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
