【now.com財經】上個星期五(6月23日)揀咗隻恒指熊(67442)出嚟，以五分鐘圖見Slow STC(14,3)上到超買時就小注出動，好貪心咁去博指數日線圖保持向下，補返6月初個裂口。
終於等到下晝2點10分，Slow STC(14,3)上到超買至嚴重超買範圍，按策略(67442)可以落場。以2點10分起計至2點25分期間， Slow STC(14,3)都Keep住處於超買位可以入場，(67442)期內高低位做過0.089元/0.086元，平均買入價為0.0875元。不過，上星期五尾市時段見指數有一下抽高靠近19,000點，證價縮到落去0.07X元，都咪話唔驚。
今朝返嚟指數見低開44點，開市報18,845點，到正式開市後，指數用1點殺18,800至18,899點第一層熊證，呢度有相當於864張期指街貨，其後指數於五分鐘圖見下影線抽高至依家9點48分見過高位19,901點，仲將指數由跌轉向升，依家升54點，報18,944點，勇敢過Weekend嘅(67442)證價一跌返落去0.07X元水平。平常心，因為依家9點53分見返指數再次變紅，(67442)證價又忽然抽返上去，依家證價0.086元，同平均買入價相約，唔想同佢顛嘅可以呢啲位走人算數，當無事發生。如果比多少少耐性嘅，就等返五分鐘圖見Slow STC(14,3)落返去超賣，當行咗一趟Swing Trade亦都可以。
至於keep住目前等指數補返6月初個裂口嘅話，依家10點2分恒指暫時低位都仲係18,799點，同上個星期五嘅低位18,800點出咗爭一點嘅「平底」，呢個部份要留意一下啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
