【now.com財經】星期三(6月21日)恒指大裂口下行之後，幾乎都係喺低位橫行等收市，假期嘛，今日A股都係繼續休息，北水暫停下，怕且港股都可能開一開市之後又係等收市。
依家9點4分，U盤行緊都見到唔少股份見紅。先睇恒指牛熊證街貨圖，見今日兩邊都未有新增街貨層，熊證最貼價為19,800至19,899點，同星期三收市價有逾500點距離；至於牛證最貼價見19,100至19,199點，同現價當然近，而且呢層儲咗成千張期指街貨，變成最多新增同重貨區。向下數落去啲牛證街貨層都有唔少貨喺度，足以反映博反彈心態有幾高。
都啱嘅，技術上恒指連跌三日之後，指數目前於日線圖上踩住保歷加中軸，博中軸見支持非常合理，雖然Slow STC(14,3)兩線仍然向下，不過日線保歷加通道目前橫行中，由頂線開始出現觸頂向下回落去，問題係踩中軸就完呢趟Swing，還是要過埋中軸，落返去保歷加底線/Slow STC(14,3)到超賣先至安落。
嚟到依家9點27分，恒指完U開跌83點，點數唔算多但報19,135點呢口價，將19,100至19,199點嘅重貨牛打到得返35點生命值，而且再落嘅19,000至19,199點呢層都有成900幾張期指街。另一方面，恒指呢口開市價擺位上已經低於日線圖保歷加中軸，兼低走埋五條主要平垮方線。當然佢今日係有權爬返上去串住條中軸，之後嘅事之後再算，不過喺市場未見有咩好消息嘅情況之下，都係唔好抱住咁大嘅博反彈心態。
果然真係唔好同街貨作對，恒指開市只係用咗四分鐘時間就將首兩層牛證街貨全數吞落肚，呢兩層夾埋有相當於2,221張期指，依家9點44分，恒指最低做過18,909點，當佢第三層死埋都仲可以。然而，由五分鐘圖開始畫到去日線圖都完全拉唔到線，佢咁狼我都唔客氣喺日線圖搵到一個6月2日嘅上升裂口Mark一Mark住，呢個裂口喺18,465點至18,548點。假設指數向下殺到落嚟呢個位，以今日嘅牛熊證街貨圖計，即當佢衝到落去18,400至18,499點的話，on top可以再食多3,375張期指，滯過我今年食嘅粽嘅總和。
再到9點50分，恒指確認將首三層牛證街貨全數收回，3,096張期指袋袋平安，作戰室亦陸續爬完第一注淡倉，再出淡倉爬落去唔係唔得，而係無今朝開市到依家咁爽啫，同埋多咗個風險係如果之後指數玩完等收市，咁保歷加通道口就會由依家拓闊變成橫行返，如是者Slow STC(14,3)同指數亦會出現觸底再變Swing，條通道有幾窄唔係未見識過。
恒指熊(67442)，收回價19,727點，今日新上市所以未見有街貨，同現價有逾720點距離，槓桿約24.68倍已經係全港最高，見到個裂口再加埋今日指數失日線中軸，開始起貪念，先等五分鐘圖Slow STC(14,3)上返超買位先，而如果上到超買位時，點數擺位仍然低於日線中軸的話。(67442)出動，今次試下用日線嚟博指數向下Swing到落底線前嘅裂口位，玩咁耐所以注碼上要留意一下。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
