【now.com財經】噚日揀咗隻恒指牛(66497)出嚟，平均買入價為0.0475元，Set好退少少用20小時線做量度線，但位置就要嚴守。
都唔駛守好耐，事關一到2點，小時圖再生出嚟嗰支燭已經低走於20小時線，再喺噚日嘅【輪證下半Part】最後睇到嘅係五分鐘圖見指數有Keep住想向下再行嘅感覺，同埋喺嚴守止蝕下，(66497)喺兩點後見指數低走於20小時線亦都即走。以2點起計如常用10分鐘作為走貨時間的話，即以2點至2點10期間走隻(66497)，按期內高低位做過0.039元/0.035元，平均走貨價為0.037元，呢一趟平均比返10.5格/22.11%阿市，唔緊要，賭仔迷信性格：每逢下半個月我都係旺啲架！嗯！希望啦！
隔晚美股一如預期停止加息，雖然會後公布嘅點陣圖預示年底時利率中位數將會升到上5.6厘，即較依家嘅仲有50個基點可以再升，換言之加息周期未完，所以隔晚美股見紅。
不過，港股向來就係走相反路線，美日台之前係咁創唔知幾多年月日新高時，港股就向下沉底；至今日港股終於都無啦啦發圍啦，開市升218點，報19,626點。到依家9點50分，指數升幅一度擴大至逾270點，高見19,681點，喺牛熊證街貨圖上見。暫時未有傷亡報告。
「如果噚日隻(66497)無被震走嘅話，今日乜仇都報晒啦...」都係架，依家睇返隻(66497)證價飆高至見0.06X以上，但噚日嘅時侯你係唔會知今日發生咩事，如果知嘅話，應該無人會返工，仲好贊成惡劣天氣下市照開；隨時連紅日都要求港交所(00388)開門。
依家距離10點只有1分鐘，作戰室第一注好倉隨大市方向高開追出嘅都已經食晒餬，再等嘅就真係10點後小時圖嘅擺位，事關如果開個日線圖就會見到目前指數係被50天線同250天線夾住，以依家見嘅50天線19,712點計，即係同恒指目前高位只係爭31點；至於下方嘅250天線依家見19,564點，同今朝指數低位19,550點，稍穿14點。頂底都拉到好盡，無計，本身件事唔闊，50/250天線高度只有148點，而目前指數嘅即市波幅就只得131點，絕對贊一贊指數係善用空間。
嚟到依家10點11分，指數高開後低走，作戰室第二注淡倉都完成埋。依家再睇五分鐘圖嘅係整條保歷加通道呈上中，指數同Slow STC(14,3)兩線齊齊出現觸頂向下回落，只不過繫題在於指數係以保歷加頂線至五分鐘10線、還是用中軸，定係決定行最大範圍嘅落到底線咁去做Swing啫。
等到10點24分，五分鐘圖上見指數目前失守五分鐘10線，但未到中軸已經稍稍觸底，開始有少少悶局嘅情況。換上小時圖見指數下影線穿過250小時線，10小時線仍然抽高中，恒指牛(66446)，收回價19250點，同現價有逾360點距離，槓桿約41.74倍其實都唔一定死用小時圖玩，不過，如果見小時圖10線有支持嘅，比多次機會佢出注好倉試下佢支持力，Alert嘅位今日都有幾多，尤其是日線圖50線，或者五分鐘圖見Slow STC(14,3)上返超買，就當完成一趟Swing就算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在為我家肥貓搵餐罐。
