【now.com財經】噚日輕鬆食咗隻恒指牛(66061)，平均賺幅有12.5格或23.58%，餘下嘅時間都係等收市。
依家9點13分，天文台話今日會有狂風雷暴，屋企人都關心我家肥貓會唔會好驚；但我發覺佢開始喺狂風暴雨嘅日子，由初初會暱喺檯底，到依家大搖大擺喺屋企裡面行嚟行去，出面有出面嘅行雷，佢有佢喺梳化亮出個肚腩仔午睡。
恒指未完U，作戰室已經差唔多人齊咁滯，未睇分鐘同小時圖之前，戰友Jack開心share咗張圖比我，留言「唔知今日破唔破到位呢.....」我再開晒啲平均線出嚟，就見到指數噚日高位19,572點同噚日嘅250天線位置(19,583點)差唔多，即係又嚟挑戰牛熊分界線。
到完U後見指數微升26點，報19,547點，日線圖上見指數仍然靠近250天線。而每朝早都會喺作戰室同戰友睇埋五分鐘同小時圖，都留意到唔止日線圖挑戰250天線，連小時圖嘅250小時線都同指數愈迫愈近。
至正式開市後，指數開高低走後於五分鐘圖上踩住50分鐘線再上衝至暫時(9點41分)高位嘅19592點，呢口價的確係篤穿咗日線圖條250天線(今日見19573點)，當然，最後嘅結果就只係出咗條上影線出嚟，然後指數再縮返落啦。但其實換上保歷加通道的話，指數同頂線根本仲有一截距離，Slow STC(14,3)兩線目前處於超買至嚴重超買範圍，即係話指數其實係仲係上行空間，問題係有無力。(有位唔一定要上嘅)
10點未到，恒指攻到上19,600點樓上，第一層熊證街貨層19,500至19,599點重數死亡，呢層由噚日嘅重貨區變成今日嘅只有相當於3張期指嘅街貨區，收唔收其實都無乜所謂，猶如等開飯時食咗一粒花生咁嘅分量。去到19,600至19,699點或打上情況就唔同，懶得數近幾層每層都有400至600張期指街貨，好似開始上菜咁。更重要嘅係依家指數企咗喺日線圖250天線之上，作戰室小注好倉一早開出，不過仲未可以放鬆，因為仲有小時圖250線要過。
終於等到10點，暫時未見指數好願咁企住喺250小時線之上，明白嘅，係有難度嘅。蓋日線圖企得住250天線，再加上今日見熊證街貨近又多，恒指牛(66497)，收回價19,200點，同現價有逾400點差距，槓桿約44.39倍夠做Day Trade，但如果以小時圖嚟做Trade嘅話，不如等等指數稍回落10小時線見支持後先至再追。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
