【now.com財經】噚日喺作戰室上下兩個半場加埋出咗兩至四轉，格仔係爬到嘅，但轉身真係要夠快；至於喺呢度，就完全無出到任何倉，事關小時圖見指數噚日一開市被前日嘅「平頂」位19,541點頂住，用咗一個上半場將指數推落去小時圖中軸後，再用一個下半場時間將指數由中軸推返上去，不過收市見指數仍然未到頂線。依家9點5分，恒指行緊U盤，暫時見保歷加通道口有少少拓闊，而Slow STC(14,3)兩線呈上中，如果指數喺小時圖可以上破得到「平頂」位的話，咁上面堆熊證就有麻煩啦。
呢個小時圖「平頂」都真係唔係講玩笑，今朝指數開市跌48點，報19,355點，擺位上雖然仍然靠近上方熊證街貨層，但由於牛熊兩邊其實都只係爭193呢層係無咗，可想而知其實指數稍為郁一郁，都會唔覺意去咗對面陣地。
今日個天好似無噚日咁曬，恒指開市後跌幅都有見擴大至接近100點，五分鐘圖上見到保歷加通道底線向下拓闊，係爭條頂線點擺，不過無論係擺上(通道口拓闊)還是擺下(整條保歷加通道向下)都好，順勢的話指數都係向下行嘅機會比較高，關鍵係在於單邊落，還是Swing Trade跌。
依家9點40分，換個小時圖則見指數踩住小時圖中軸水平，未穿架，所以作戰室第一注淡倉出動咗之後，除咗留意住五分鐘圖保歷加通道走勢之外，同步都Alert緊小時圖嘅中軸，如果呢個位有支持的話，咁小時圖慢慢就行咗一個新嘅「長方形」出嚟，頂線見「平頂」19,451點，底線則大約19,280點左右，兩者相減，得出「長方形」高度只有171點，窄過屋企條渠呀！
10點未到，恒指跌幅擴大至110零點，作戰室亦有戰友唔貪心地爬完格仔，為今日嘅第一注取得正數；仲連早幾日嘅滙豐(00005)淡倉都順便食埋，爽。
終於都落出雨，成個天都黑晒，不過指數忽然大大力咁講跌幅收窄，小時圖上見10點嗰粒燭仍然企於保歷加「上升通道」之上，睇返整個走勢，小時圖中軸都幾夠力呀，恒指牛(66061)，收回價18,900點，同現價有接近400點收回距離。槓桿約40.2倍都夠Day Trade用。
抽高嗰下作戰室反應比我更快，我連句嘢都未打完指數就已經縮緊，之後戰友s都開晒牌...或者呢啲就係時間累積落嚟嘅經驗令大家都進步啦。
再到10點9分，五分鐘圖上見指數升幅再次拓闊，(66061)如常用Swing Trade的話，等返Slow STC(14,3)兩線落到超賣水平先至出手，博行一趟Swing Trade都夠做啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
