【now.com財經】噚日揀咗隻恒指牛(64598)，平均買入價為 0.0435元，本來仲諗住喺五分鐘圖上畫埋條底線出嚟作為量度線，但見到保保歷加通道口愈收愈窄，都真係有啲倒胃口，結果最後喺噚日嘅【輪證下半Part】講(64598)都係見好收算數。
以噚日Patreon出文時間下午1點6分，如常的 on top 比10分鐘時間作為睇文的話，即大約1點16分再睇返個市，當時雖然指數都仲守得住條量度線，但見好就收嘛，以此起計10分鐘作為走貨時間的話，即以1點15分至1點25分，(64598)期內高低位做過0.057元/0.051元，平均走貨價為0.054元，一計之下呢一趟熊咗幾日之後久違了嘅好倉平均執10.5格或24.14%，為6月 有個好開始。
噚日個天暗暗的，仲有雷打咗入人哋間屋裡面(睇返新聞原來係打中外牆)；今朝個天又光返晒，火辣辣嘅太陽照埋今日恒指，開市升349點，報18,566點。到正式開市後，指數一下子飆高升逾400點，將熊證第一層街貨18,500至18,599點全數收回]，雖然呢度只係得209張期指，但對於噚日喺牛證築起主力牆嘅好友嚟講，今日一開市已經可以直落Happy Hour！
換個小時圖見指數今日裂口高開上破噚日硬過我條命嘅保歷加中軸，有料呀，裂口上去你因住呀！事關依家9點42分，小時圖上見保歷加通道頂線只係稍稍向上翹起，未算係好見到保歷加通道口有拓闊嘅情況。至於Slow STC(14,3)兩線則於中軸水平已見%K線再次高走於%D線，仲有無位上就要問問保歷加啦。
再睇埋個日線圖，噚日低位出「倒轉錘頭」後，今日暫時見出「大陽燭」回升，Slow STC(14,3)都有反映，皆因保歷加頂線開始向下，將整條通道由通道口拓闊變成向下之後，比咗指數同Slow STC(14,3)出觸底回升嘅條件。佢上得咁狼我亦都同佢鬥兇狠，Mark住條10天線位睇下過唔過到先再講。
作戰室好倉亦已經出動，嚟到依家9點51分，恒指於高位稍為回一回氣之後，升幅再擴大到依家升476點，報18,693點，第二層熊證都應該凍過水，兼開始諗定熊證重熊區18,700至18,799點嗰1132張期指街貨會唔會今日之內都無埋。
終於等到10點，見指數於小時圖仍然靠近高位附近，保歷加通道口有稍稍拓闊嘅情況，同時留意到上方有50小時線喺度。
再睇返五分鐘圖，Slow STC(14,3)兩線已經出緊超買再超買，但如果保歷加通道底線與頂線同上向上的話，咁指數同Slow STC(14,3)出現Swing嘅情況就會大增，博18,700至18,799點重熊今日收皮的話，恒指牛(65422)，收回價18,318點，同現價有約400點左右距離，槓桿約56.57倍夠做Day Trade，今日新上市所以未有街貨，安全嘅都真係等一等指數稍為踩返住啲平均線有力上先至再出動。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
作戰室七日免費試用：https://www.patreon.com/cbbcwar
