【now.com財經】噚日揀咗隻恒指熊(64944)出嚟，平均買入價為0.065元，Set好五分鐘圖10線作為量度線。當大市連18100點都失守埋之後，大家嘅呼歡聲變成嗌見18,000點，不過，喺噚日1點50分，恒指落到18,044點之後就未見有再向下行，五分鐘圖上亦見指數出現爭三點嘅「平底」，隨後於1點55分指數反方向一抽，穿過五分鐘圖10線，(64944)發出走貨訊號。
如常的用10分鐘作為走貨的話，即按1點55分至2點5分，(64944)高低位做過0.074元/0.07元，平均走貨價為$0.072元，呢一趟平均賺幅有7格或10.77%；將今個月嘅【月度報告】整體成績推到+241.8%；雖然未計因交易而產生嘅手續費，但七除八扣之後今個月都唔係好差啫。
今朝被出面嘅雷嚇醒，熱咗咁多日終於都落下雨；而恒指跌咗咁多日，本以為今日會做返好少少，但仍然都係敵唔過近肥牛嘅吸引，指數開市跌44點，報18,190點。不過，睇到五分鐘圖上見指數擺位仍然企喺五分鐘圖10線之上。到正式開市後，指數跌轉升一度見升近100點，作戰室一早Mark住小時圖10線同五分鐘圖100線，因為兩者都好近，點數上係有上破過，但嚟到依家9點39分計，指數暫時仲未係企得好穩。
睇埋個街貨圖其實就會明點解佢企得唔穩。雖然今日見熊證有新增街貨層，最貼價落到去18,700至18,799點，但同現價都仲有500點左右嘅距離。再睇埋堆牛證，幾乎全個銀河系有錢嘅都放低1蚊跟機博反彈，雖然目前未見到有一條棒棒嘅期指街貨數量係過千，但見佢哋好平均咁擺位，築起咗一度比主力牆更厚嘅街貨牆。好直線嘅做法的確係會向住街貨衝過去，事關街貨 VS 技術分析嚟講，10次有8次都係街貨贏，不過，今次應該係第9同第10次嘅技術分析贏。
依家9點51分，恒指升幅一度擴闊至逾130點，睇返五分鐘圖嘅走勢會見到由噚日到依家指數行出一個「大圓底」出嚟，頸線位用返噚日嘅開市口價18,415點睇，過得到嘅話，好友被人壓咗咁耐，補埋噚日嘅開市裂口(裂口頂見前日(5月30日)收市價18,595點)都咪話無可能。
仲有6分鐘就到10點，小時圖見指數「大陽燭」向上推高穿過10小時線，似有再戰20小時線嘅情況，都過得到嘅話，恒指牛(64598)，收回價17,948點，同現價有約380點差距，槓桿約有39.85倍，狼就狼咬上噚日個開市裂啦啦！否則...又熊過...
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
作戰室七日免費試用：https://www.patreon.com/cbbcwar
