【now.com財經】久違了個股方向搵飯食，今朝揀咗隻百威亞太(01876)Call(27132)。以Patreon出文時間10點7分計，同樣地比10分鐘時間睇文，即10點17分時再睇返百威嘅走勢圖。五分鐘圖上剛好見到百威啱啱出咗支「大陽燭」爆上，股價被推到高位見22.6元後即出「平頂」向下回落，及至10點50分失守50分鐘線(五分鐘10線)，再落靠中軸啦喎，如果唔係隻Call又係出唔成。
終於等到11點，股價向下落到100分鐘線(五分鐘圖10線)，亦即係保歷加通道中軸，下影線穿過低見22.3元，比多五分鐘同樣下影線穿過中軸，低見22.35元，以爭一格出現「平底」，隨後股價被推返上去中軸水平之上，吼中軸有支持+爭一格「平底」出現而出隻(27132)可以，淺嘗小注按期內高低位做0.365元/0.355元，平均買入價為0.35元。
股價期後有再程上，五分鐘圖上更見小V反彈出現，不過於頸線前止步，還好回落幅度唔算高，中午收市前見股價仍然咬住中軸位橫行，而(27132)輪價半日見0.375元。
依家1點18分，下晝嘅太陽都已經曬到入屋，明明己經11月中，但都仲係好似夏天咁熱咁，睇返百威走勢，剛好見股價再次飆上22.6元，即係今朝見嘅小V頸線位，可惜似乎呢個位阻力頂得好緊。
如果喺小時圖上睇嘅話，22.6元呢個位更加係三粒燭「平頂」高位，Slow STC(14,3)兩線都已經上到超買至嚴重超買範圍，但保歷加通道都只係整條呈上，如果保歷加通道口拓闊的話，咁就真係唔怕Slow STC(14,3)出超買再超買。
望望月曆，今日Happy Friday，過夜的話就要過Weekend，先以10小時線(小時圖10線)作為止蝕位，如果咁堅由依家1點25分至到4點前都守得住的話，咁就用臨收市前嗰10分鐘作為走貨時間啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
