【Now財經台】莎莎國際(00178)中午出咗中期業績，虧損收窄至約1.3億元，繼續唔派息，午後股價跌幅一度擴大至逾6%，點解市場仍然唔收貨？莎莎股價上個落到0.83元水平後有反彈，如果以噚日高位計，累計反彈約40%，後市仲有冇動力向上？
艾德金融聯席董事陳政深指，莎莎虧損收窄有好多因素，包括獲得政府嘅保就業補貼，同埋租金開支少咗，以及有回撥收入。佢又話，本港零售市道差，睇返9月嘅零售業銷貨值，藥物及化妝品類創1年新低，由於上述提及嘅收入，同公司本身嘅營業表現，以至本港零售業前景都冇乜關係，所以市場對呢份業績唔太滿意。
Ryan續指，莎莎股價近日上返50天線，即1.1元水平徘徊，但仲未企得穩，維持上落格局，未來除非業績有好大改善，或者本港零售市道能受惠於開關，屆時內地旅客可以來港，否則，估計莎莎股價未來會繼續受壓。
