【Now財經台】莎莎國際(00178)中午出咗通關後首份中期業績，轉賺1億元，毛利率按年升4.1個百分點，符合盈喜預告，係咪冇太大驚喜？唔派中期息又係咪預期之內？
亨達財富管理董事總經理姚浩然指，睇返莎莎資產負債表，存貨較去年同期大增，涉及近2億元，由於現金水平減少，如果再派息，手頭現金就會更少，所以唔派中期息係可以理解。
莎莎收入主要靠線下銷售，但旅客銷售僅佔48.6%，明顯低過疫情前嘅74%，面對大量港人北上消費，會唔會令莎莎銷售增長受壓？
Patrick就話，對集團銷售增長無疑係一個挑戰，因為本港疫後復甦情況比預期差，即使長假期都睇唔到有好多內地遊客來港消費，限制咗莎莎呢方面嘅銷售，加上本港經濟唔算特別好，整體需求減少，港人嘅本地消費開支都少咗，令莎莎銷售增長受壓。
