【Now財經台】教育股新東方(09901)今朝低開逾6%，跌幅不斷擴大，一度挫逾10%，低見17.5元。
新東方係被審計底稿嘅中概股之一，公司噚日公布，喺今年9月29日向美國證交會(SEC)提交咗財政年度報告，喺10月6日獲SEC暫定為委員會識別發行人，即工作底稿無法由美國公眾公司會計監督委員會(PCAOB)進行全面檢查或調查。如果連續3年都因為咁而冇辦法檢查核數師嘅工作底稿，就會被除牌。
呢份通告意味新東方除牌風險增加，噚日似乎有春江鴨搶閘沽貨，今日跌勢進一步加劇，一度失守100天線，即17.6元，要繼續觀察後續發展。
