【Now財經台】截至早上11時止，1小時內《彭博》用戶關注度上升最多港股，依次為比亞迪控股(01211)、旭輝控股集團(00884)、萬科企業(02202)、中遠海控(01919)及旭輝永升服務(01995)。
今日有3隻內房物管股上榜，旭輝系更齊齊上榜，旭輝開市1分鐘後突然停牌，市傳涉及先舊後新方式配股，配售8.4億股，配股價2元，較停牌前折讓逾12%，雖然市傳只係旭輝配股，但係咪因為「阿媽」停牌沽唔到，走去沽「阿仔」旭輝永升，拖累股價今朝一度急瀉逾16%？
獨立股評人譚智樂指，的確有呢個可能，信物管同母企內房嘅股價走勢會一致，旭輝喺呢個時候停牌，市場一定睇淡，當然，真正原因仍未知道，所以投資者唔好咁快下定論。事實上，部分內房股喺近3個月面對唔少問題，例如債務違約、表外負債等，所以市場擔心係正常，亦唔應該貿然買入。
佢又話，如果投資者揸住市場上較高風險嘅板塊股份，唯一可以做係衡量個人持貨比例有幾高，風險承受能力有幾強，唔止要定止蝕位，未來更可能面對停牌、重組等問題，建議揸住物管嘅投資者減持，更認為物管股比內房股更唔吸引。
