【Now財經台】吉利汽車(00175)中午出咗業績，收入增長唔錯，但純利倒退35%，明明上半年內地政策要促進汽車消費，藉此刺激經濟，但呢份業績係咪同一直聽到嘅消息，甚至消費氣氛有好大落差？
艾德證券期貨聯席董事陳政深指，其實針對某個行業推出嘅政策愈多，反映呢個行業面對嘅挑戰愈大，內地汽車業本身已經要面對消費轉弱嘅情況，如果視汽車係必需品嘅人，早已成為車主，而未必要買車嘅人，亦唔會喺經濟前景唔明朗下買車，睇返上半年及7月銷售數據，係明顯較過去放慢，車企喺呢個情況下，亦要諗計促銷。佢又話，內地汽車業處於轉型狀態，新能源汽車銷售增長強勁，但吉利約80%汽車仲係用石化能源，所以面對嘅挑戰絕對唔細。
股價方面，Ryan認為，吉利股價依家處於關鍵時刻，後市要留意守唔守得住50天線，即16.6元水平，一旦失守，有機會落到15.3元。
