【Now財經台】今日多隻汽車股反彈，其中以藍籌吉利汽車(00175)升得最靚，不過，4S經銷商相關股續受壓，其中，中升控股(00881)跌至兩年低位，集團噚日出通告指因應國家二手車發展策略，喺全國設置二手車交易平台，但似乎冇乜刺激作用。內地全面撤銷二手車遷入限制，但政策落地對股價完全冇沖喜作用，呢類股份係咪好難谷得起？
華盛証券分析師聶振邦指，中國汽車流通協會出咗報告，指上半年有超過一半汽車經銷商唔達標，依家先開始有啲國策扶持，對整體行業未必有好大改善作用。聶Sir又話，內地上半年經濟偏弱，導致汽車銷情差，而4S股亦冇特別傾銷策略，導致相關股份受壓。
