【Now財經台】大成糖業(03889)配股集資約3055萬元，仲提及「迫切需要現金」，截至去年底止，公司手頭現金780萬元，但銀行貸款逾9億元，全部屬於短債，負債水平相當高，公司講到十萬火急，但只係籌逾3000萬元，今次集資其實係咪另有原因？
《香港股票財技密碼》作者梁杰文指，大成負債逾9億元，就算配股籌到呢筆錢全部用嚟還錢，隨時還息都唔夠，值得留意係，呢筆錢除咗用嚟還債，部分會用嚟採購玉米及作營運開支，投資者開始覺得今次配股集資只係杯水車薪，根本唔可能完全解決債務問題，亦係睇到公司通告，先知道大成負債金額已經去到天文數字，不過，通告講嘅嘢唔係一定要落實，即使前執行董事孔展鵬有意入股，但冇人知後來係咪有阻滯，令入股計劃告吹。
