【Now財經台】據外媒報道,俄羅斯天然氣完成年度維修後,或會恢復對歐洲供氣,但產量會減少。歐盟又估計,一旦俄羅斯停止供氣,或會令歐盟GDP受損,仲會出現能源危機等連鎖反應,俄羅斯最終決定會係點?此外,天然氣供應少咗,可能又要用返煤,煤炭股係咪可以受惠到,其中兗煤澳大利亞(03668)已連升7日,憧憬及利好作用係咪真係咁大?
英皇證券研究部總監陳錦興指,照現時嘅情況估計,俄羅斯部署上有一定難度,睇返基本面,俄羅斯恢復對歐洲供氣嘅機會係大咗,但供氣量應該會調整。
Stanley又認為,俄羅斯未必會太極端咁完全「斷氣」,因為能源只係反制歐洲其中一項政治工具,如果完全停止供氣,亦會損害俄羅斯經濟。佢又話,隨著歐洲不斷加大對俄羅斯嘅制裁力度,即使俄羅斯恢復供氣,數量亦大不如前,估計最多相等於過往40%。