【Now財經台】由於能源價格可能再度急升，港股多個能源相關板塊被炒高，石油石化、煤炭等全部逆市有得升，其中兗礦能源(01171)股價破頂，旗下兗煤澳大利亞(03668)亦急升，喺歐洲能源危機下，差唔多所有能源相關股都被掃高，兩者嘅關連性係咪咁大？
元宇證券投資總監林嘉麒指，過往投資者會覺得內地一啲能源相關股份都唔係做出口生意，政治因素唔好令價格上升，但俄烏戰事引致全球能源價格飆升，之前似乎係唔關事嘅公司，依家都受惠於能源價格上升，歐洲冇天然氣入口就要搵煤炭替代，雖然中國唔係媒碳最大出口國，但由於煤價上漲，令兗煤澳大利亞呢啲股份都受惠，而國際油價上升就利好中國海洋石油(00883)，所以相關股份都有炒作，事實上，睇返中期業績都引證到唔少公司都可以受惠。
