【now.com財經】今朝揀咗恒指熊(57444)同恒指牛(55693)出嚟，並以恒指五分鐘圖上嘅50分鐘線(五分鐘圖10線)作為界線，穿過，出(57444)；企穩，出(55693)。以今朝Patreon出文時間為10點8分，on top用10分鐘刨文的話，即10點18分(好計數啲我哋用10點20分)，睇返五分鐘圖，當時見指數低於50分鐘線以下位置，按策略即係出(57444)，又再On top加多10分鐘作為入市時間，由10點20分至10點30分，(57444)期內高低位見過0.046元/0.038元，平均買入價為0.042元。
入咗市之後都驚驚地架，事關再睇返個圖，原來指數又上返去50分鐘線以上水平，還好未見到有好大支棍向上打起，與此同時保歷加通道口有收窄嘅情況，落去後捱咗20分鐘，即10點50分已經見到指數再次失守返50分鐘線以下水平，(57444)算是鬆一口氣。
再過多10分鐘，指數有Keep住繼續向下落，電話突然響起，收到Message話日本前首相安倍晉三喺當地時間11點半(即係香港10點半左右)喺街頭演說時中咗槍，即刻喺作戰室叫大家睇下啲Yen嘅情況，同時我都開始搵定新聞砌稿。無幾耐再收到新Message話安倍失去知覺，仲有流血嘅情況，日經升幅大為收窄。不過，當我打好晒所有稿嘅時侯，日經、Yen都已經好似無事發生過咁，左改右執之下，搞到依家1點2分，下半場開埋市，先至執好晒，拿拿聲去搵啲嘢食再做下半場；一拉凳起身見到身後嘅我家肥貓瞓到進入忘我境界...戒咗煙兩個月嘅我都不禁諗返起支煙。
極速填咗個肚之後，下半場見到指數仍然保持處於保歷加下降通道，雖然目前保歷加通道口有收窄嘅情況，但如果指數一直處於保歷加下降通道而捱得過佢收窄完再拓闊嘅話，咁隨時又有一波向下行嘅走勢出現。
幻想永遠總係美好，但Set定以指數上破保歷加通道中軸作為走(57444)都不為過。依家1點17分，(57444)證價都做緊0.053元，對比平均買入價，均食11格/26.19%，都係算啦，呢個位割，都已經Happy Friday啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
