【專家分析】AI幫唔到瑞聲谷高估值？

【Now財經台】瑞聲科技(02018)今日中午(19日)出咗業績，去年收入318億人仔，按年增長16%，純利就按年增長約40%至約25億人仔，派末期息35仙，按年大增46%，毛利率及派息比率等大致同之前差唔多。睇返公司5大業務，其中，電磁傳動及精密結構件收入持續快速增長，按年增長25.5%，成為公司最大業務。瑞聲股價午後大幅抽高，一度高見34.74元，大升近4%，其後升幅收窄。瑞聲前景係咪可以繼續值得憧憬？

王道資本及家族資產管理執行董事黃敏碩認為，雖然見到部分業務數據強勁，但都要留意電磁傳動及精密結構件嘅應範圍未來可唔可以擴大。佢又話，公司嘅聲學及光學產品都面對「內捲」，以及整個生產鏈成本高企嘅問題，所以市場都唔敢過分睇好端聲前景。

他又指，雖然瑞聲業務出現突破，例如元器件供應商發展成為人工智能(AI)感知基礎設施建構者，但未必有條件可以咁快同市場接軌，所以較難因為呢個因素谷高估值。

Michael又話，市場焦點始終都落喺AI，如果業務唔加入AI元素，有機會出現生存唔到嘅問題，不過，即使瑞聲加入AI應用，某程度上都只為咗提升公司效率，因此，佢對於借AI全面推動業務，甚或提升公司認受性嘅睇法有保留。