【專家分析】李偉傑:車企「內捲」未必會持續

【Now財經台】內地汽車市場「內捲」問題持續，車企「淘汰賽」亦講咗好多年，近日比亞迪控股(01211)發動新一波減價戰，車企要點做先可以喺呢場「淘汰賽」下繼續生存？

天風國際證券經紀業務部董事李偉傑指，之前比亞迪係靠技術提升銷售吸引力，包括「天神之眼」及「3分鐘快速叉電」，後來就出現減價嘅情況，先令市場關注「內捲」問題。佢又話，依家定價最吸引係入門版車款，即使未去到最極端情況，都已經令官媒「出聲」，指要及時叫停及有效防範內捲，所以未來「內捲」未必會持續發生。

Jason又話，依家車企除咗要面對比亞迪發動嘅減價戰，又要睇可唔可以靠自身技術或車款吸引消費者，加上近年唔少車企積極進軍海外市場，因為海外銷售毛利比內地高，但中歐同美歐關係嘅變化，會成為車企能否「出海」關鍵。