【名家給力場】梁杰文:科軒動力首要任務係...

【Now財經台】科軒動力控股(00476)宣布以每股0.45元，較上周五(18日)收市價折讓近34%，向現有股東徐化配售6000萬股新股，集資淨額2680萬元，徐化持股量將會由9.42%大升至28.36%，成為單一最大股東，公司有3大主業，分別係採礦、金屬礦物買賣、發展及銷售電動車，其中，電動車輛銷售以電動巴士主打，睇返公司截至3月底止全年業績，基本上100%收入都係來自電動車業務，但表現非常差，收入按年大跌約93%，虧損就擴大至逾3.7億元。公司曾經話，業務會持續轉型至「電動公共交通」領域，今次配股集資有逾70%，用作現有採購定單及開發專用電動交通解決方案業務，符合公司發展方向，新股東加上業務轉型，科軒動力值唔值得憧憬？

《香港股票財技密碼》作者梁杰文指，買家都係大型機構及公司，包括政府機構等，但市場只集中喺香港，全年業績收入只得300萬元，反映交付量低，如果收入持續得幾百萬，有機會被港交所(00388)評定為業務不足而除牌，加上本港電動車市場競爭十分激烈，包括比亞迪股份(02011)等龍頭，雖然公司新業務有憧憬，但始終競爭大，依家公司首要係諗辦法改善業績。

Mike又話，徐化係可再生能源、清潔能源相關嘅行業有經驗，加上其金融知識，相信成為大股東之後會有新動作，否則唔會用咁大筆錢接手。