【封殺AI戰大敵】內地禁科技巨企買Nvidia AI晶片？

【now.com財經】近排美國人工智能(AI)晶片龍頭英偉達(Nvidia)似乎冇個好消息， 繼日前市監總局指，Nvidia違反反壟斷法，會對集團作進一步調查後，最新又傳嚟另一個不利消息。

據英國《金融時報》引述消息報道，內地監管機構要求幾家最大型科技巨企，停止買所有Nvidia AI晶片，又要終止現有定單。

報道又話，中央向科企施壓，要呢啲公司幫手推動本土晶片發展，目的係擺脫對Nvidia嘅依賴，喺AI大戰中同美國競爭。報道續稱，字節跳動(ByteDance)及阿里巴巴(09988)已煞停Nvidia為中國度身訂造嘅RTX Pro 6000D測試。