【炒起股價】雲知聲去掘瓦努阿圖AI金礦？

【now.com財經】全球科技企業近年爭相掘人工智能(AI)金礦，主戰場包括美國、中國及歐洲等，不過，AI解決方案提供商雲知聲(09678)最新開闢咗一個「新戰場」，就係太平洋其中一個島國瓦努阿圖(Vanuatu)。

雲知聲昨日(15日)收市後公布，指已經同瓦努阿圖共和國政府簽咗同AI相關嘅MOU，近期亦已經啟動咗戰略合作，做緊具體部署。到底雙方會有咩搞作？集團就話，雙方會聯手推進基於AI大語言模型及物聯網平台嘅智能化應用落地。

雲知聲股價今日(16日)照炒咗上去，一度高見569元，大升8.3%，其後升幅收窄，收市報549元，仍升4.5%。

值得留意係，集團今年6月30日上市，即係只上咗市12日，如果以今日收市價計，較上市價205元，已累升逾1.6倍，市值已突破400億元。