【股市脈搏】快手見8字頭後 再挑戰最強蟹貨區

【Now財經台】港股持續強勢，恒生指數連升4個交易日，喺恒指及科技指數升幅榜三甲都見到快手(01024)，股價今日(23日)午後一度大升逾8%，高見78.85元，升上2023年以來高位，收市報77.9元，仍大升7%，全日成交金額逾60億元。

快手旗下「可靈AI」推出後反應理想，大行重估對快手估值，唔少目標價都睇80元以上，股價喺首季業績後反覆向上，滙豐證券出咗報告，上調快手目標價至82元，係主要大行中最牛，而大行亦對「可靈AI」進行獨立估值，指潛在價值相當於每股約13元。

快手現價離8字唔遠，相信喺大行加持下，係有機會挑戰呢個位，但值得留意係，高峰時期快手曾經見過400元，但自從跌穿100元後，股價横行咗差唔多4年，若今次成功突破80元關口後，下一站就要上望最重嘅蟹貨區。