【Now財經台】泡泡瑪特(09992)「吸金王」Labubu第3代「前方高能」系列今日(25日)發售，內地網上昨晚(24日)已搶閘開賣，有網民話，微信開售只係1秒就掃光，淘寶就好少少，5秒先賣晒。
「前方高能」系列共有6個顏色，另有1隻灰黑色「隱藏版」，近日已經有喺內地抽盒機成功買到Labubu 3.0嘅人喺網上炒賣，原價99元人仔，香港零售價120元，網上放售價介乎190元至350元，炒價高低要視乎係咪搶手嘅顏色，其中， 「隱藏版」暫時最高索價約1700元，其次係紫色，炒價暫時最高350元，就算被指核突嘅顏色都炒高1倍。此外，有人原條放售，即一套6盒，聲稱深圳現貨要1500元一套，但要等3至4日先收到貨。
多家大行喺「前方高能」系列開賣前上調泡泡瑪特目標價，摩根士丹利由164元上調至204元，評級「增持」，瑞銀更睇到216元，評級「買入」。
不過，泡泡瑪特股價今日先升後跌，高開1.3%後，升幅一度擴大至2.3%，高見184.4元，但之後掉頭向下，最新報175.8元，跌2.3%。
